Shehar Ka Shehar Agar Aaye Bhii Samjhaney Ko
Is Se Kya Farq Pray Ga Teray Dewaney Ko

Jis Qadar Weham Hain Sab Us Ke Atta Karda Hain
Liye Phirta Hon Kisi Aur Ke Butt-Khaney Ko

Yeh Hunar Wo Hai Jo Dil Se Kabhi Seekha Na Gaya
Tu Ne To Jorr Liya Torr Ke Paimaney Ko

Kya Koii Khail Hai Be-Naam O Nishan Ho Jana
Waisey Shama Bhii Tyaar Hai Jal Janey Ko

Wo Ajab Shakhs Tha Kal Jis Se Mulaqaat Hoii
Main Milla Hon Kisi Jaaney Hoye Anjany Ko

Aaj Ke Dukh Bhi Kisi Se Nahi Jhailay Jatey
Yaad Mat Kar Kisi Bhooley Hoye Afsaanay Ko

Door Tak Raat Kii Aankhon Mein Kahen Neend Nahien
Itna Sanata Hai Ke Aaye Koii Tarpanay Ko

Zindgii Bhar Mein Koii Shaey To Mukamil Kar Lien
Aao Labraiz Karien Sabr Ke Paimanay Ko

Yeh Alag Baat Ke Eik Boond Muqadar Mein Na Thi
Sar Pe So Baar Ghata Chaaii Rahii Chaaney Ko

Shaam Honey Ko Hai Jalnay Ko Hai Sham E Mehfil
Saans Lainey Ko Bhi Fursat Nahien Parwaney Ko...